La storia di Lodovico Bramaltoco
(Monologo in dialetto Visentin de Aldo Fin)
(Espero que. más o menos, se entienda todo)
Voio contarve la stòria de Lodovico Bramaltoco, orbo de na gamba e soto de un òcio. El gera un tipo che’l pensava sempre ai tempi antichi, quando i copava i peoci coi pichi, e i ferava i gati co le fete de salado, se vendea la merce a tre brassi e un franco, tre bale e un soldo, tre cai co la ola e i ‘ndava par aqua con la sesta. El gera parente del cugnà del fiolo del nevodo dela serva del arciprete dela meleta del pontepassero. Quelo el diseva de esser cogo, invesse el gera fasente funsion del sotovice capo sguatero.
So bisnono el gera conte parché el contava le stele stando in leto, el dormiva co la scùria par difénderse dai pantegani e col ombrea verta parché pioveva zo. Dunque so bisnono el gera conte, so nono contin, so pare contadin e lu el gera so fiolo. So pare ala festa marciava in capelo e so sorea faseva servìssio campo marso nele ore de note. So zio gera l’osto del Megheto e Lodovico dormiva nela càmera dei saladi. Questo so zio gaveva inventà un bevaron col eticheta stampà – rinfresca, riscalda, tonìfica, molìfica, fortìfica, strense, slarga, s-ciara la vista, move el cataro e fa pissar ciaro. Lodovico ghenà bevù na bossa e così ghe ze vegnù el tifo, el tanfo, la rogna, el sgranfo e el cagoto a scossi. E si che le ze un tipo esperto! figureve che el ghe ga dà na s-ciafa al bocae de pisso, el ga smerdà la luna col bacheto, el ga inventà el musarolo par le piàtole, el ga portà la malatia dele suche e i lo ciama spesso a s-ciopare le piàtole al ospedae. El ze anca un toso económico; ndando a strasse el ga rancurà tanti de quei peoci che con la pele el se ga fato un par de guanti e lu se li mete quando el ga sono, così dala spissa el resta sveià. El va spesso coi amici Ganassa, Tranche e Moleca al masselo Comunale ala ricerca dele balete de peo nele buele dei vedei copà.
Un giorno el ragionier Puineta, vècio come Marco Caco e parente de Bortoeto Caca, cugnà de Pacina che gaveva i cessi in piassa, ghe ga indicà l’avocato Sparasela, paron del albergo dele quatro efe, (fredo, fumo, fame, fastìdio) come un bon avocato de cause perse. Infati nel processo contro Rómolo Schissa, Toni Boassa, Memo Coessa e Bórtolo Giossa, el ga fato assòlvere la siora Squàquara Spacaossi, che nel canton del spìgolo del àngolo dela curva dela svolta dela strada la gera stà ofesa da lori. Così per meso del avocato Sparasela el ga otegnù la licensa de véndare: fuminanti, cerini, lapis, fini, biro, patina col lùcido, candele par la note saltinpansa, amareti, rovina fameie, stracaganasse, storti del dolo, forti de Bassan, pandoi de Vicensa, cuchi e sigoloti, buei per far saladi, el unguento par la rogna, la tegna e la giossa al naso. El so amico Cornolò ga invità al so matrimònio, mandàndoghe questa partecipassion: Cornolò Cornèlio da Cornedo Vicentino, sonatore di cornetta e Cornale Rebecca da Cornuda, operai in ogeti de corno e cornici, ti invitano al loro matrimònio a Cornigliano Lìgure. Viaio de nosse al Corno d’oro e crociera in Cornovaglia. Lodovico ga partecipà ale nosse e al sposo el ghe ga fato par regalo un capeo co le màneghe. El ga n’altro amico, parente del Onorevole Gava che ga nome Pierluca e la morosa la se ciama Francesca Duro. Anca lori ga invità Bramaltoco al matrimònio; ma sicome Pierluca, come se usa desso, i lo ciama Luca e so morosa i la ciama Checa, così nel invito gera scrito: Luca Gava e la Checa Gava Duro. Lodovico par regalo de nosse ghe ga comprà do vasi da note col mànego a sinistra. Par questo i so amissi ghe vol ben, anca parchè el porta in testa un capeo che ghe stà ben come na merda s’un ferale, e lori i lo ciama con qualche soranome; ciùcia nèspoi, caga stròpoi, sgrigna papoe, sculassa bote, mastega brodo, becamorti, pelaoche, smerdarolo. Qualche volta el va a pescare le rane col feraeto. A vardarlo in distansa el fa na bea lontanansa, parché el ga un peto che fa stómego, ma el ze tanto sensìbile che se el vede qualcosa de bruto, el resta putrefato. Quando che’l tase no’l parla mai e la sera apena el se spoia el va in leto.
3 comentarios
Lodovi -
El Checa Gava Duro -
Sisampica -